منگلور 16 جولائی (ایس او نیوز)ایک ہفتہ سے جاری مسلسل اور موسلادھار بارش کے نتیجے میں جمعہ کومینگلور کے قریب کُلشھیکر اور پڈیل کے درمیان ریلوے ٹریک پر قریبی پہاڑی کی مٹی کھسک جانے سے  ٹرین سروس متاثر ہوگئی۔

ذرائع سے ملی اطلاع کے مطابق  محکمہ ریلوے کی  جانب سے پہاڑی پر سے مٹی کو کھسک کر ریلوے پٹری پر گرنے سے روکنے کے لئے ایک دیوار بھی تعمیر کی گئی ہے   مگر  پہاڑی پر سے  مٹی کا اتنا بڑا تودہ  گرا کہ  پٹری اُس کے نیچے دب  گئی اور  حفاظتی دیوار بھی کام نہ آسکی۔

پٹری  پر مٹی کا بڑا تودہ گرنے کی وجہ سے فی الحال  مینگلور سے تھوکور  کی طرف جانے اور آنے والی ٹرین سروس متاثر ہوگئی ہے۔ جبکہ ریلوے حکام  مٹی کو ہٹانے کے کام پر لگ گئے ہیں۔